Skedus

Gwechall-gozh, e Bro-C’hres, skridoù kaer ar varzhed
Gant paour ha pinvidik ’oa prizet dreist pep tra ;
Bep bloaz, e-kreiz ur gouel, e veze kurunet,
Gant lidoù bras-meurbet, ar varzhed ouiziekañ.

Dudius ’oa neuze gwelet o teredet,
Niverus hag a-bell, en o dilhad kaerañ,
Ar bobloù, laouen holl, gant ar c’hoant da glevet
Rimadelloù dispar hag eus ar re goantañ.

Neuze spered ar barzh e pep lec’h a oa Roue,
N’eus forzh pe c’halloud all a zlee dont goude,
Ya, neuze c’hoazh e ouient tridal ar c’halonoù.

Ouzh ar varzhed e Frañs e prenner an divskouarn ;
A wal[a]c’h eo gouzout pignat war ur marc’h-houarn ;
D’an divesker hepken e vez savet prizioù.