Skedus

Ya, ’pad c’hwezek kant vloaz, o barzhed a Gymru !
Kaer ’noa ’n avel c’hwezhañ hag an neñv bezañ du,
C’hwi a vire bepred, re-da-re, an teñzor :
Skiant an drouized, deut deomp dre hoc’h eñvor.

Bremañ meulomp Doue ! Goude un noz ken hir,
An heol ’ya da barañ c’hoazh war hon zaloù dir,
Arru eo an amzer da glask dorn ha skoazell.
Iwerzhon, Bro-Gymru, ha Skos ha Breizh-Izel
A zo c’hoazh peder c’hoar distaget met bev mat
En o c’halonoù tomm, o virvi, memes gwad.

Bugale o feder d’ar C’helt kozh hep aon,
Setu, o tihuniñ, o deus memes naon.
Na kabestr, nag hual a-berzh an Ermaeziad !
Re bell o deus ’n’ o c’hreiz kuzhet o c’halonad !
Unaniezh ’ra nerzh ! Pa vefomp unanet,
E vo rouantelezh ar bed d’ar C’heltied.

Savit ’ta barzhed kozh a bep kostez ar mor !
Ar Gwenved, evidoc’h ’neus na moger na dor.
Gweltaz, Herve, Kadog, Aneurin, te Merzhin,
Liwarc’h Hen, ha Gwiklan, ha te Taliesin !
Distroit c’hoazh ur wech d’an Abred trubuilhus ;
Grit diouzhomp barzhed awenet ha nerzhus,
Ra skoio ho mibien o bec’h diwar o chouk
Ha ra vo deus ar bed troc’het gwrizienn an Droug.