Skedus

A-walc’h tridañ, ma c’halonig !
Tav, paourig kaezh, kousk ha tav mik…

****

Keloù ’meus bet deus ma c’hoantiz,
’Zo aet un devezh gant he giz,

Ha war ma lerc’h deut d’ar Gêr-Vras
Ouzh ma c’hlask pe da’m gwelet c’hoazh.

Tost d’an iliz, ’vit he gortoz
’Oan o vale, ’vel ’raen bemnoz ;

Hag hi da dremen : Doue ’oar
’Ur plac’h a sell yen pe glouar.

Na ger ’trezomp ; nemet raktal
’Kuzhas en iliz ’vel gwechall.

Gortoz ’oa din diwar an hent :
Mouchet eo din Doue ha sent ;

’B’oe ’meus kollet ar garantez,
Eo laosket baradoz Doue…

****

’Vit an noz-se ’oan dihunet
O klevout gouel ouzh an oaled,

’Korn an oaled un aelig gwenn,
Un alc’hwezh aour en e gerc’henn,

Moarvat alc’hwezh ar baradoz,
’Lec’h e nijas d’an hanternoz,

Nemet ’oa deut, ’vit kimiadiñ,
Ur verc’hig kaer evel lili…

****
Setu ’vo ugent bloaz bremañ,
’Noz ’eo marv ’meus ’n huñvre-mañ.

Tud vat, p’em c’havfet ma-unan,
’Vin o lenvañ da’m anaon ;

Na’m dalc’hit ket, m’hoc’h eus truez :
War seulioù ma dous ’vin neuze.