Skedus

E Milin-Vor ’oa ur vatezh,
        tic-a-tac
Glas he lagad ha flour he mouezh
        Tac-a-tac-a-tac-a-tac.

E Milin-Vor ’oa ur paotr-karr,
Leun e borpant ha reut e c’har.

D’ar sadorn-bask, graet he c’hrampouezh,
Da glask he faskig hi a eas.

An absolvenn hag hi ’neus bet ?
Hini ’r paotr-karr ne lâran ket.

Ken ar paotr-karr a-raok nav miz
’Laoskas ar vatezh war e giz.

Un deiz, lemmet e vein gantañ,
Ar miliner ’lâre ’koulz koan :

- N’ouzon ket, ab’oe div noz zo,
An durbinenn n’a ken en-dro ;

Ab’oe div noz zo ur vouezh eo,
’Klemmgan er stank miserere,

Sordet eo ar vilin ha ni :
Aotroù Person, disordit hi. -

Ar vatezhig, ’vel m’her c’hlevas,
Gant an diri d’an nec’h ’pignas ;

Ha d’en em daol eus ar c’hrignel
Eus lec’h ’n doa taolet he bugel.

Dre he mennozh a zo lâret
He c’hrouadur ’neus badezet ;

Pe dre vennozh e vamm ma n’eo,
’Michañs a-berzh ’n Aotroù Doue :

Rak en noz war-lerc’h ar vouezhig
Benedictus ’gane koantik.

Evit paotr-karr ar Vilin-Vor,
        tic-a-tac
Er galeoù ’mañ o koll gor.
        tac-a-tac-a-tac.