Skedus

Pell ouzh ar vro a garer eo garv da vervel !
Allaz ! ken pell da guzh-heol ha du-hont Breizh-Izel,
          Ma bro gaezh Breizh-Izel.

Ar valaneg zo ledan ’vel an oabl da greisteiz,
’Lec’h e klemm ’vel anaon an avel d’abardaez,
          An avel abardaez.

Dindan un troad radenenn ur gudon ’oa neizhiet,
Kouldri steuñvet gant kevnid ’mesk ar glizh alaouret,
          Ar c’hlizhenn alaouret.

Er c’hoadoù don ’zo pelloc’h an noz a zo du-dall ;
Eno ’maint al loened gouez ’hed an noz o vlejal,
          ’Hed an noz o vlejal.

Hag ivez tro-pad an deiz deus al liorzh da’r c’hoad
Emañ kludet en delioù ’n evned o vegeliat,
          Evned o vegeliat ;

Evurus ’vel an aelez ’tiskanont bep amzer,
Strafuilhet an neñv gante ’vel ’ra bili ’n dour sklêr,
          Bili kou’et en dour sklêr.

Pa save bannac’h avel, bemnoz diwar ma dor,
’Sellen ar c’hoabr o rezañ ’vel listri war ar mor,
          Al listri war ar mor.

E-barzh iliz ma farrez eo kaer an ofisoù,
Hag ar c’hleier zo skiltrus… Kleier kaezh, kenavo !
          Kleier santel ma bro !

E pevar c’horn ar vered a zo savet elvenn,
Ar groaz zo kuzhet e-kreiz ouzh skourroù ’n ivinenn,
          Skourr glas an ivinenn.

Diwar dachenn ar vered grit sklentin ho c’hoari
Hep aon ebet, bugale, ma hunig da derriñ,
          Grit sklentin ho c’hoari ;

Ha banniel kaer ar pardon pa ray an dro pep bez,
Merc’hed kaezh, ne gavfet ket en o zouez ma bez-me,
          Ne gavfet ket ma bez.

Hag eo gwir ’zo ret din-me leuskel ma yaouankiz,
Hep den da ouelañ ganin, na m’ dougen d’an iliz ?
          Siwazh da’m yaouankiz !

Me ’garfe c’hoazh ur wechig gwelet ouzh kloued ar porzh
Ti ma mamm o vogediñ hag aze’iñ ’n he liorzh,
          Ti ma mamm ! al liorzh !

Aotroù Doue, gwall c’harv, re c’harv da vervel
Pell ouzh ar vro ’zo karet, ken pell a Vreizh-Izel,
          Ma bro gaezh Breizh-Izel !…